new urdu poetry life dua 2020

کرم مانگتا ہوں عطا مانگتا ہوں الہی میں تجھ سے دعا مانگتا ہوں

عطا کر تو شانِ کریمی کا صدقہ دلا دے الہی رحیمی کا صدقہ

نہ مانگوں گا تجھ سے تو مانگوں گا کس سے تیرا ہوں میں تجھ سے دعا مانگتا ہوں

الہی ہمیں شاد ومسرور رکھنا بلاوؔں سے ہم کو سدا دُور رکھنا

پریشانیاں ہم کو گھیرے ہوئے ہیں پریشانیوں سے پناہ مانگتا ہوں

جو مفلس ہیں اُن کو تو دولت عطا کر جو بیمار ہیں ان کو صحت عطا کر

مریضوں کی خاطر دعا مانگتا ہوں الہی میں تجھ سے دعا مانگتا ہوں

ہوا ہے نہ مایوس تیرا سوالی پھرا ہے نہ کوئی تیرے در سے خالی

یہاں تیری خاطر جمع سب ہو میں سب کی طرف سے دعا مانگتا ہوں

الہی تجھے واسطہ پنجتن کا ہو شاداب غنچہ دلوں کے چمن کا

الہی تجھے واسطہ غوث الوریٰ کا الہی میں تجھ سے دعا مانگتا ہوں

نہیں منت کشِ تابِ شنیدن داستاں میری

خموشی گفتگو ہے، بے زبانی ہے زباں میری

یہ دستورِ زِباں بندی ہے کیسا تیری محفل میں

یہاں تو بات کرنے کو ترستی ہے زباں میری

اٹھائے کچھ ورق لالے نے، کچھ نرگس نے ، کچھ گُل نے

چمن میں ہر طرف بکھری ہوئی ہے داستاں میری

اڑا لی قمریوں نے، طوطیوں نے، عندلیبوں نے

چمن والوں نے مل کر لوٹ لی طرزِ فغاں میری

ٹپک اے شمع! آنسو بن کے پروانے کی آنکھوں سے

سراپا درد ہوں، حسرت بھری ہے داستاں میری

مرا رونا نہیں، رونا ہے یہ سارے گلستاں کا

وہ گل ہوں میں ، خزاں ہر گل کی ہے گویا خزاں میری

الہی! پھر مزا کیا ہے یہاں دُنیا میں رہنے کا

حیاتِ جاوداں میری، نہ مرگِ ناگہاں میری !

(علامہ محمد اقبالؒ)